14 December 2016

多謝THOMSON送嚟佢地既二合一蒸氣焗爐(型號:TM-SL328)
一開箱先見到隻隔熱手套、一個小零件、我最鍾意睇嘅說明書同埋保養咭

之後就托到毎爐出嚟喇
不鏽鋼機身,爐門係鏡面嚟,都幾靚仔
不過正正因為佢用靚仔鏡面,我又未執屋,所以點影都反射到環境或者自己
我梗係無咁傻豬post畀你睇,畀條手柄你睇下算啦

其實個面都幾靚,用觸控面版,無一粒粒制但開機會著燈果種,好cyber囉
個爐門係雙層玻璃,隔熱好啲,無咁易散熱氣,所以一般爐溫都會穩定啲


打開入面有個拉得出嚟嘅儲水箱,同埋內置程式嘅「貓紙」


個爐有26公升,我個人就鍾意啲大到可以藏屍果啲焗爐,但個廚房邊夠大喎嗚!
當然仲有啲基本配件,網架、焗盤同埋個集油盤都齊

焗爐功能方面佢最高可以set 250°C,除咗上下火全開仲可以set單開上火定下火,呢個功能唔錯!
蒸烤功能方面有分高溫蒸汽同低溫蒸汽,最高都係可以set 250°C
仲有蒸汽解凍、保溫功能,同埋可以set預約時間
佢嘅自動菜單程式包括蒸魚呀蒸雞呀蒸水蛋焗雞翼焗蛋糕等等夾埋10種,說明書都有晒食譜
咁多功能入面我最想試佢個發酵功能!
因為冬天凍果陣比起夏天發酵時間長好多
如果有個爐幫下手keep住個發酵溫度
無啦啦想整包都唔使等咁耐

=====================================================

19 December 2016

冬天最怕就係整啲要發酵嘅麵團果陣太凍,等到餓瓜都未發得起阿團?
試過啲方法例如擺啲熱水喺阿團隔嚟
再放喺隔熱嘅地方例如無著嘅微波爐或者保溫箱入面等發酵
不過熱水始終會變凍,未發得起又要換水?
加上次次環境因素唔同,溫度唔同,發嘅時間都唔一樣
有時發得唔夠,又試過發過龍焗起一大陣酵母味?

THOMSON 二合一蒸氣焗爐(TM-SL328)有發酵功能
其實就係預熱後可以穩定咁保持40°C


對於我呢啲整包唔叻嘅人真係好有用?
唔止可以比平時發酵得快啲
仲可以次次用同一個溫度發酵,盡量減低環境因素嘅變數
可以每次都有個穩定嘅環境做,慢慢研究改良啲包包食譜
唔怕因為溫度變化而搵唔到食譜嘅「死因」!

今次整咗個非常簡單嘅阿團嚟整咗個pizza
用咗發酵功能阿團快高長大?

焗果陣仲可以好好利用佢有得單開上/下火嘅功能


保證pizza底焗得金黃之餘個面又唔會黑蚊蚊!

個爐呢就唔是完美嘅,我覺得佢預熱時間比較慢
要等耐少少先上到今次用嘅200°C(最高 250°C)
但發酵果40°C就好快預熱夠喎
用咗焗爐溫度計嚟試,發酵時40°C溫度都準同保持到
但高溫果陣如180°C以上佢就爭咗大約5°C咁上下
不過焗嘅中途溫度都保持得幾穩定
同好多爐一樣,都要用返幾次同佢熟咗就無問題
最後嘅投訴係,我想佢大返啲,小家庭兩三個人無問題
焗小雞當然得,焗火雞就無可能喇?
雖然我屋企都唔多人,但係有鋪「焗爐藏屍癮」
好想要個裝得落自己嘅焗爐囉!?

(利申:產品由代理商冠恒集團贈送)

(Visited 3,193 times, 1 visits today)