#自費 #非廣告
呢排整咗好多次梳乎厘班戟,唔爭在試埋預拌粉。
倒出嚟啲粉好細緻,因為用咗米粉Rice Flour而唔係一般嘅麵粉,
個盒仲寫明用咗不含鋁嘅泡打粉。
一盒粉加三隻蛋加水加菜油整到七至八塊,
我費事食唔晒只係整咗三份一嘅份量。
好容易就可以攪到幼滑無粉粒,粉漿算杰身。


用少少油,每面細火煎兩三分鐘就得。
煎果陣比一般預拌粉整嘅脹得厚啲啲。
容易整到厚身班戟,
但高度同質地同自己整嘅梳乎厘班戟無得比。


因為佢完全係靠泡打粉嚟膨脹,
而唔係好似自己整咁主要靠打入蛋白嘅空氣,
所以質地完全唔一樣,
我覺得呢個質地似發糕多啲……
佢用咗米粉,所以唔會覺得佢粗鞋而且比用麵粉有彈性。
味道方面,其實多數預拌粉整出嚟都有陣奇怪類似發粉味嘅味道,我覺得佢都有少少。
喺Aeon買,$54.9一盒,預拌粉嚟講都唔平呀!
其實整班戟嘅材料好簡單,
我一路都覺得班戟預拌粉有少少多餘,
用咗都只係慳咗麵粉、泡打粉、鹽同雲呢拿,
可能就係方便啲唔多整嘢食嘅人用一次半次,
屋企有齊整蛋糕材料嘅真係無謂買。
佢比其他預拌粉就係用咗米粉同落多咗泡打粉囉,
但就比一般預拌粉貴,我就覺得唔係好值,
同埋重點係,唔使旨意佢真係整到梳乎厘班戟。
#梳乎厘班戟 #舒芙蕾鬆餅 #班戟預拌粉

(Visited 2,940 times, 4 visits today)