#懶得執相系列 #啲相順序睇埋caption啦
一月中無啦啦執到四日假出嚟,
本來想去日本但怕自己一個去會凍死又有啲趕,
咁轉目標做台北不過睇天氣又話落雨,
之後台中台南二揀一,
兩度我都無去過,
因為睇到論壇有人話台南用app call的士好方便,
咁就去咗台南啦!

基本上除咗出咗個post問網友機場有無ATM之外,
我係完全、完全無做過任何功課,
有乜嘢景點食店我都唔知,
全部都係去到先google。
所以詳細都無乜參考價值㗎喇,今次講重點罷啦!

今次行程:
Day1: 中午到台南 – 藍晒圖文創園區 – 保安路小食 – 酒店屙屎 – 林百貨 – 大東夜市 – 酒店屙屎
Day2: 早起屙屎 – 羊肉湯早餐 – 水晶教堂 – 井仔腳鹽田 – 七股鹽山(屙屎) – 路經正統鹿耳門聖母廟 – 四草綠色隧道 – 安平豆花 – 安平樹屋 – 安平老街 – 奇美博物館 – 成功夜市 – 酒店屙屎 (是日包車)
Day3: 自然醒屙屎 – 碳烤佐里 – 貓薄荷手工蛋糕咖啡館 – 酒店屙屎 – 太陽牌冰品 – 誠品 – Daiso – 屙屎 – 黃家豬心 – 武聖夜市 – 酒店屙屎
Day4: 早起屙屎 – 一味品碗粿 – 義豐/阿川冬瓜茶 – 經過全美戲院(手繪電影海報) – 老李早餐店 – 你我他之家 – 等咧粉圓 – 酒店屙屎 – 中午後離開

🔸機場內只有一部ATM,我用匯豐咭拎到錢,排前面個香港女仔拎唔到錢,好似撞彩
🔸機場有中華電信電話咭買,可碌咭
🔸台南機場真係細到喊,回程可起飛前一個鐘先到機場
🔸巴士好on9,要租電單車或單車,或者全程的士,無uber,有幾個call的app
🔸「呼叫小黃」(call的app)可以用香港電話同信用咭reg,起飛前搞掂,落地換咗咭都可以用
🔸好多景點都有啲悶,例如七股鹽山同四草綠色隧道真係好有大棠荔枝山莊feel
🔸個人推介景點:井仔腳鹽田(地方唔大但未見過)、奇美博物館同安平樹屋
🔸個個夜市都唔係日日開,例如花園夜市只開星期四、六、日,所以要check返各個夜市開邊日
🔸某啲攤販會擺各個夜市,例如A夜市唔開嗰陣會去B夜市開工,所以就算你日日行唔同夜市可能都會撞到同一個老闆
🔸台南食店無中過伏,就算唔使排隊都好食,至少唔會難食
🔸夜市真係揀比較多人買嘅食中好嘢嘅機率大啲,不過多數都唔會難食,可能只係無咁好食
🔸根據以上幾點,我覺得無必要日日都行夜市
🔸食咗幾日發覺台南嘢食通常平過台北,中伏率低啲,多數都好實在好足料,所以平啲又食飽啲
🔸今次主攻台式嘢食,但google見都有唔少新潮嘢,嘢食方面真係唔會輸畀台北
🔸感覺台南地方真係好大,啲路闊啲、啲景點大啲、條街都長啲
🔸shopping無台北咁精彩
🔸台南人真係好熱情又好開心,我自己一個人去到邊都有人同我傾計,好多人都話佢地台南人錢唔多但知足開心,所以個個都笑笑口,所以如果你放開啲同佢地傾計,你都會好開心
🔸可能有人會覺得台南悶、鄉下,我覺得台南市內似台北無咁光鮮嘅市區,無牛,唔係鄉下。雖然shopping輸蝕,但人真係贏晒,嘢食都好強,如果你鍾意食、鍾意同人傾計,一個人去都真係唔會悶!
🔸台南好可愛!台南好可愛!台南好可愛!

#台南旅遊 #台南遊記 #肥波遊記

(Visited 33 times, 1 visits today)