今次嘅旅行最大嘅一個目的就係搭500 TYPE EVA 新幹線。
2015年係山陽新幹線全線開業40週年同新世紀福音戰士電視動畫版播出20週年,
為咗紀念,啟動咗500 TYPE EVA PROJECT
包括特別設計嘅新幹線列車、Café、商店同紀念商品。
計劃暫定2018年春天結束,所以其實都嚟到尾聲,再唔去就要後悔喇!!!

列車嘅第一卡係「500 TYPE EVA 展覽和體驗室」,
第二卡係有EVA設計嘅「特別內部裝飾車廂」,
除咗以上車卡、特別嘅塗裝外表,同埋列車內第一至第三卡之間某啲裝飾之外,
其地車卡係同一般嘅新幹線列車一樣㗎。
第二卡係自由席嚟,所以如果搭呢架車係為咗坐有EVA設計果個車廂,
係無必要畀多啲錢買指定席嘅車飛!
只要有新幹線車票或者某啲鐵路周遊券就可以上車。
可用於500 TYPE EVA 列車的周遊券包括:
山陽&山陰地區鐵路周遊券(7天)
瀨戶內地區鐵路周遊券(5天)
關西&廣島地區鐵路周遊券(5天)
廣島&山口地區鐵路周遊券(5天)
關西廣域鐵路周遊券(5天)
關西&北陸地區鐵路周遊券(7天)
岡山&廣島&山口地區鐵路周遊券(5天)
山陽&山陰&北部九州地區鐵路周遊券(7天)

配合返我地嘅行程,我地先喺出發前上網訂咗廣島&山口地區鐵路周遊券,比起喺當地買平咗¥1,000一個人。
(可於使用日前2-27天前於網上預訂,填妥資料後收妥及列印確認郵件,到達日本後於指定車站出示確認郵件及護照於當地付款領取車票。)
我地先喺博多車站領取JR pass嘅櫃枱拎車票,車站職員會問我地成個周遊券有效期內打算去邊度,
再話畀我地知張車票啱唔啱用同埋有邊個站需要補錢買其他車票順便幫我地買埋。
其實個過程都係等你清楚啲同埋唔好搞錯買張唔啱用嘅pass,
因為基本上拎住張pass喺有效嘅車站之間可以無限次進出乘搭,
所以拎車票時未必講得最自己去邊都無所謂,最緊要知道自己買張pass可以喺邊啲站用。

我係喺廣島玩完先搭EVA車返博多,因為想搭嘅車卡係自由席,而且仲要係列車路線嘅中間上車,
所以真係好緊張好驚上唔到車,又或者上到車但坐唔到第二卡。
早咗半個鐘左右去月台等車,等到EVA車到站果下真係好激動又好感動!!!😭💓😭💓😭💓😭💓😭💓😭💓😭💓😭
果架係慢車,好埋可能熱潮已經過咗去朝聖嘅人唔係咁多,
所以其實好多當地人當佢係普通車咁搭,可能搭一兩個站就會落車。
我上車果陣大約坐滿咗六七成咁啦個車廂。

一上車搵咗位坐低我就衝咗去第一卡嘅「展覽和體驗室」
入面有多塊展示板,不過都係寫日文,睇唔明,不過我都睇咗好耐。

有個模型櫃放咗初號機嘅模型。

仲有一個人形立牌,入面啲姐姐仲好好人會主動幫你渣機影相,可惜我去果陣係真希波😫😫😫

入面仲有個「實物大駕駛艙」,要預先喺網上預約先可以玩,
聽講唔係日本人會book唔到,不過好似都見過網上有教學教「外國人」book,我就無深究。
如果無人玩緊都可以入去睇下同影相,不過坐落去就唔得喇。
就咁睇都覺得好型呀!兩年前開果陣要抽籤先有得玩,而家好似易訂咗好多,
我搭程車個半鐘入咗去三次都唔見有人玩,可惜。

參觀完就返咗第二卡,除咗座椅,有好多位都加咗EVA設計,真係一路坐一路出水呀!

座椅連手柄都好型。

牆身。


小餐枱。

連太陽擋都有特別設計。

車廂頭兩行會預留畀訂咗駕駛艙體驗嘅乘客,當然如果無人訂嘅果兩行都會吉出嚟畀其他乘客坐。
所以呢兩個個太陽擋都會有啲特別呢!第一行係碇源堂。(司令在看著你嘿嘿嘿)

第二行係絕對領域。(嗚呀好型呀用絕對領域遮太陽!!!)

仲有個地板真係好型呀!!!!!!

睇夠第一卡同第二卡,我覺得坐定定實在太大嘥,
所以我行返去第一卡,由第一卡再從新睇起行到去第八卡再行返去第一卡…
事實真係由第三卡度門之後到第八卡真係同EVA無關。😅😅😅
第八卡最尾有個咁嘅位,好似係畀小朋友開心下果啲設施嚟?!

第二、三、四卡嘅車門,由入咗第四卡開始其他車廂嘅車門都無特別。

第一﹑二﹑三卡車箱之間嘅裝飾。

公用電話上、垃圾桶同廁所塊鏡上面。

第三卡同第二卡好似但無EVA裝飾,除咗其中一度門。

第二同三卡中間同第六同七卡中間有吸煙室,但只有第二同三卡中間果兩間房有特別。
其中一間有加持,另一間係赤木博士,連塊玻璃都有特別!

行咗咁耐影咗咁多相玩咗個零鐘,之後返去第二卡坐,一路睇暴走,真係一大享受!

仲有一個興奮位,就係喺車上面嘅到站預報音樂係EVA主題曲音樂,到總站果陣仲會係加長版!
落車當然係衝去影車頭相。

之後去咗博多站入面嘅EVA Café
外面放咗幾個人形立牌、500 TYPE EVA列車模型同埋一啲食物模型。

呢碗麵唔算吸引但係好想要個碗呀!!!麵類補完計劃!!!

餐廳入面仲有初號機!!!😍😍😍😍😍😍😍😍😍😍

行埋啲睇…

唔同角落仲放咗唔同嘅砌圖。

仲有成套漫畫畀你拎嚟睇!

嚟得EVA Café當然仲要食啲嘢,雖然預咗唔好食。

我地叫咗使徒咖哩飯、500 TYPE 班戟、明日香飲品同凌波凍咖啡。
使徒咖哩飯好可愛、好鹹、無餸、唔好味。

500 TYPE班戟好型、班戟乾、芒果唔甜、唔好味。


飲品個杯有NERV logo好型、唔好味。

雖然全部嘢都唔好味,可以話係難食,但係我真係好。開。心!!!❤️❤️❤️❤️❤️❤️

最後一站就係出閘後嘅EVA shop!!!榨乾荷包嘅最後一站!!!

連道員工門都好型。

間鋪頭真係好細好細,有好多之前家姐嚟買到嘅嘢都賣晒,淨低有好多嘢都係買唔落手果啲。
同埋好多商品都同500 TYPE列車有關,無搭過嘅話其實買又真係無乜意思同唔曉感動。
不過就算係咁,我喺度都使咗好多錢…

買到最鍾意嘅嘢就係呢隻使徒公仔…

其實上網都買到同埋有更多款:http://www.evastore.jp

EVA shop隔嚟仲有部500 TYPE EVA貼紙相機!!!
啲背景真係好柒!
我本身諗住自己一個影都無所謂,點知肥仔肯陪我一齊柒!
影出嚟真係好柒㗎!!!😂😂😂😂😂😂


搭車加埋Café同Shop玩足半日,興奮足全程。
好多謝肥仔唔係EVA fans都肯陪我發花癲發咁耐,
我地全部都係拉住一個大喼同一袋行李,
我完全無理過,全種淨係衝嚟衝去影相,
佢就要負責晒啲行李同等我…
我真係幾衰,不過值得㗎肥仔!我咁開心!哇哈哈哈哈哈…

(Visited 326 times, 1 visits today)