【食譜】三文魚芝士醬

書面語食譜連結

話說呢樣咁屎忽鬼既野係我阿媽話想食叫我整…

1. 紅蔥頭去皮切碎。
   
    
2. 三文魚骨腩洗淨印乾備用。
   
    
3. 中火燒熱鑊，加少少油，油熱後轉中慢火落紅蔥頭炒約 3 – 4 分鐘至金黃色有香味（要保持兜炒，小心燶）。
   
    
4. 轉中猛火，倒入白酒兜勻，煮約 2 分鐘。
   
    
5. 轉中火，盡量打平咁放入三文魚骨腩，煮 1 分鐘後反面，再煮多 1 分鐘，然後蓋住，熄火，焗 1 分鐘之後夾起三文魚骨腩，另外剩低既紅蔥頭隔走啲白酒之後都留返備用。
   
    
6. 三文魚骨腩用乾淨既手拆成碎肉，魚皮﹑魚骨﹑同埋太大舊既魚肥膏都唔要，摸清楚有無骨剩低，拆完放入網篩壓走多餘既水份（其實即係白酒同多餘既魚油）。
   
    
7. 忌廉芝士同牛油放室溫至軟身，即手指可輕易按入既程度，然後攪至均勻幼滑（無需要用打蛋器，用膠刮或木匙已經可以）。
   
    
8. 煙三文魚切碎後，將所有材料攪勻。
   
    
9. 包好放入雪櫃 4 小時以上即成。
   
    

• 可以拎黎搽麵包﹑多士﹑餅乾﹑青瓜片等等。
• 我用左三文魚骨腩，因為平好多又多油啲，其賓可以用三文魚柳或者魚扒，都係煮熟後去皮去骨拆散就可以用，如果用魚柳或者魚扒預返份量都係拆起有 200 克魚肉就可以 。因為骨腩好薄身，我連埋熄火焗都係煮左 3 分鐘，如果用比較厚既魚柳或者魚扒，開火煮既時間要耐返少少。
• 煙三文魚個個牌子都唔同口味，有啲會比較鹹，最好攪勻試左味之後唔夠鹹先再落鹽。