【食譜】抹茶忌廉戚風蛋糕

書面語食譜連結

話說有一年想做一個斑蘭蛋糕畀一個朋友而開始學做未試過整既戚風蛋糕
結果做左好多次先成功，發唔起試過，發起再跌返落黎試過…形形式式既蛋糕死法都經歷過
但掌握左之後都未試過失敗，直至果日停電…

1. 預熱焗爐至攝氏 170 度
   蛋黃糊材料入面既乾材料過篩去除粉粒，用手動打蛋器攪勻，加入蛋黃糊材料入面既濕材料（分開蛋白同蛋黃時要確保蛋白入面無任何蛋黃，然後蛋白要放到乾淨無油無水既大碗入面備用）
   
    
2. 蛋黃糊材料用手動打蛋器攪勻至無粉粒備用
   
    
3. 到蛋白既部份，蛋白加入他他粉用電動打蛋器中高速打到起泡
   
    
4. 將糖霜分兩三次加入，一路用電動打蛋器高速打到蛋白顏色變白﹑表面光亮﹑泡沫細緻穩定，然後打蛋器拉起蛋白可以拉出棟企既尖端
   
    
5. 將打起既蛋白大約四分一加入蛋黃糊，用切拌法拌勻
   
    
6. 全部蛋黃糊倒入蛋白霜度，用切拌法拌勻，一開始會好似相中咁好似唔會拌得勻，但畀啲耐性，輕手慢慢拌就可以拌得好，小心唔好攪拌過度
   
    
7. 拌好後倒入戚風蛋糕模（千祈唔好塗油或用不沾模），然後整個蛋糕模由枱面上約 10 cm啪落枱，啪三下，等入面既大氣泡浮面爆開，可以避免蛋糕焗出黎入面切開有好多大窿
   
    
8. 盡快放入已經預熱好攝氏 170 度既焗爐入面焗大約 30 – 35 分鐘到竹簽插入蛋糕拎起唔再有濕粉漿痴住即可以出爐（焗既其間如蛋糕太近發熱線而蛋糕面已經變到較深色，可以快手輕輕蓋上一張錫紙遮一遮等個面唔好燶）
   
    
9. 出爐後立即倒扣，小心蛋糕面唔好同枱面太拉近因為如果有水氣走唔到會整濕個蛋糕，完全放涼後脫模即成
   
    
10. 抹茶忌廉既材料放入無油無水既容器，確保忌廉夠凍，用打蛋器打起後可用
    
     
11. 蛋糕打橫切開一半（最好用麵包刀）掃走蛋糕碎，塗抹上抹茶忌廉後夾起即成
    
     

• 話說果日焗蛋糕焗到一半時間停電停左兩個鐘。戚風就係要一口氣夠熱畀佢入面既空氣發脹如果唔係佢一洩氣就唔會脹得返佢既「最佳狀態」，結果就算停完電我再開返爐焗，我個蛋糕就矮到無倫。
  但放心，配方同方法我已經做過好多次，一定係無問題，如果你屋企唔停電既話
   
• 切拌既手法係其中一個成功既關鍵，如果唔清楚乜野係切拌法既請google影片黎參考，會比起用文字解釋易明好多