【食譜】簡易蕃茄意粉

書面語食譜連結

另一個簡單既意粉食譜
唔落茄醬，食原汁原味既蕃茄
如果你唔鍾意三文魚可以用其他肉例如雞肉代替
可以唔用螺絲粉，用其他粉例如義大利麵黎代替，都係用返一樣份量就可以

1. 蒜頭去皮切碎，三文魚切粒，蕃茄切粒(我呢啲大粒既就一開四，如果你細粒啲果啲一開二都可以)，另外開始煲一大煲熱水(之後會用黎煮意粉)
   

2. 鑊入面，開中細火燒熱鑊落少少油，油熱就落三文魚粒兜一兜，只要兜到表面變左色就可以拎起備用

3. 中細火燒熱鑊，落多少少油(最好係橄欖油)，唔駛等油熱，加入蒜頭，間唔中兜一兜，約2分鐘後會開始變金黃色 (小心蒜頭係好易燶既野)
   

4. 轉細火，之後加入蕃茄兜一兜繼續煮
   

5. 落蕃茄後煮大約3分鐘，蕃茄會開始出多左水，加入牛至，繼續煮
   

6. 繼續煮多大約4分鐘，再加入150毫升清水，繼續煮
   

7. 再煮多3分鐘之後，另一個煲緊水既煲度落鹽至大約海水咁咸，放意粉落去跟包裝指示煮(通常係7-8分鐘)，蕃茄個鑊都係繼續煮，唔駛點理佢，間唔中撩一撩佢就得
   

8. 咁過左6-7分鐘左右，意粉就黎熟晒，就加返啲三文魚粒落蕃茄個鑊度繼續煮，再加埋糖﹑黑椒碎同埋鹽攪勻
   

9. 做完上面既步驟就撈起意粉隔一隔水，唔好過冷河！撈埋落蕃茄隻鑊度撈勻煮1-2分鐘左右等佢全部都吸到汁，試味，夠味就可以上碟，可加上芝士粉一齊食
   

• 我寫到1999好似好複雜咁，其實都係計好晒時間等意粉熟時個汁又煮好，因為個汁落蕃茄後計大約要20分鐘先好食。我畫左條timeline…希望幫到大家易明少少
  

• 我用左以色列車厘茄，貪佢大粒啲同無咁酸，你可以用其他蕃茄例如普通車厘茄，但個人覺得肉茄煮呢個會太多水唔係咁適合
  

• 另外萬一有人唔知，牛至係一種香料，英文係oregano，同蕃茄好夾，我都係用一樽樽乾果種；可以喺超級市場擺香料果個架搵到，不過細間啲既超級市場就未必有得賣。