【食譜】翻轉蘋果批
書面語食譜連結
好耐之前睇完台灣綜藝節目之後做過不過乜都大大舊整出黎好醜樣
今次即興無食譜做出黎又OK喎
其實法式甜品中有一種叫Apple Tarte Tatin係呢樣野既原型
不過果種要用到酥皮同埋要用焗爐
呢個做法比較簡單方便，不過老實講係似蘋果包多過批／撻
材料都係一般方便買到或者屋企都有既野，有興趣既試下啦！
| 份量：約 3 – 4 人 | ||
|---|---|---|
| 蛋漿材料 | ||
| 雞蛋 | 1 隻 （約60毫升） | |
| 牛奶 | 20 毫升 | |
| 糖 | 1 1/2 茶匙 | |
| 雲尼拿香油 | 1/4 茶匙 | |
| 鹽 | 少許 |
| 其他材料 | |
|---|---|
| 麵包 | 約 60 克 |
| 蘋果 | 1 – 2 個 |
| 糖 | 1 湯匙 |
| 牛油 | 5 克 |
- 麵包排好平鋪 16 cm 直徑易潔平底鑊，有需要的話切成需要既形狀
- 蛋漿材料攪勻，平均倒上麵包上面，確保每塊麵包都沾到蛋漿之後放 5 分鐘等蛋漿可以浸透麵包
- 等緊果陣可以切蘋果，蘋果去皮切開一半去芯，切成大約 3 mm 厚半月形既蘋果片，切出黎既蘋果片先浸喺凍水入面備用，以免氧化
- 麵包浸蛋漿後，放上爐開慢火大約煎 3 – 4 分鐘左右至底部金黃色（面未熟透係正常）
- 底部上色後反轉喺碟上備用
- 鑊抹乾淨，平均灑入 1 湯匙砂糖，中間放牛油，開慢火煮至糖溶但未變啡後熄火，途中唔好攪動或搖動
- 蘋果片喺凍水拎上黎稍為用布或廚房紙印乾啲，糖上面排滿蘋果片，小心千忻唔好掂到啲糖，好熱！因為成品要反轉，所以鋪果陣放蘋果片醜怪果邊一片疊一片圍圈擺，咁反轉之後就係靚果邊喺面喇
- 之後將碟上果塊麵包底直接反轉蓋喺蘋果上面，開慢火，蓋住煮多大約 10 分鐘
- 蘋果應該每片都畀焦糖煮過，微微金黃色，做好之後直接反轉喺碟上面趁熱食，可配打起既忌廉或者雪糕球同食仲爽！
- 我用既係山崎既鮮奶包，個樣係似迷你既方包，切得同一般方包（唔係加厚果啲）差唔多咁厚，總共用左大約四塊，用一般方包或其他麵包都可以
- 蘋果我用細細個既加拿蘋果（Gala Apples）都係隨手拎起用，無講究品種。建議用啲爽既蘋果唔同用粉既，煮起黎比較好食。我係一個細蘋果，一開二（去芯），二開四，四開八，之後每份再切開成三至四片咁切到咁既形狀
- 如果你個鑊大啲，需要自己調較材料既份量同埋時間都未必一樣，重點係鋪好要用既包，預備足夠浸濕所有麵包既蛋漿（蛋：奶＝３：２，另加少少糖，雲尼拿香油同鹽調味），蘋果要足夠鋪滿個面，焦糖整個面都要有薄薄既一層，時間方面真係要自己小心拿揑
(Visited 1,263 times, 1 visits today)