【食譜】香蕉蛋糕

書面語食譜連結

其實…整蛋糕甜品係我至鍾意果範黎
雖然明知可能無乜人鍾意睇，都分享下睇下有無同好啦
都係好簡單既野

1. 兩種牛油放入同一個容器置室溫放軟身至可以輕鬆按到變形既程度，低筋麵粉+粟粉+泡打粉+玉桂粉+鹽 撈勻後過篩去除粉粒備用，另一個容量將糖+黃糖撈勻備用，同焗爐預熱到攝氐170 度
   

2. 牛油先用電動打蛋器 高速 打 2 分鐘左右至均勻同軟滑
   

3. 撈勻左既糖分成 3 次用篩 篩入牛油入面，每加入一次糖之後用 中速 打 30 秒
   

4. 轉 高速 打約 7 – 8 分鐘 至混合物變淡黃色同糖粒融化
   

5. 加入香蕉，用 高速 打多 1 分鐘到完全混合，然後加入第一隻雞蛋，打多 30 秒，之後加第二隻雞蛋同雲尼拿香油，打多 30 秒
   

6. 分 3 次加入已經撈好同篩左既乾粉，轉用木匙或膠刮，每次加入乾粉後打圈撈勻至見唔到大部份乾粉，再加第二次，最後一次攪到見唔到乾粉就可以停手
   

7. 粉漿平均倒入 8 – 9 個 底部直徑 5 cm 既杯子蛋糕模入面，放入已預熱 170 度既焗爐焗大約 15 分鐘至升起，表面金黃，中間篤竹籤入去拎出黎無野痴住就可以出爐
   

• 焗既溫度 170 度 15 分鐘係根據我自己既焗爐開左熱風對流功能，如果你個焗爐無呢種模式，通常溫度要較高少少或者焗耐少少，個個焗爐都唔同溫度同設定，最緊要留意蛋糕既情況調較溫度同時間

• 可以用唔同既模具，不過請根據蛋糕大小黎調較自己焗既溫度同時間

• 牛油我兩溝用左金桶牛油同普通既無鹽牛油，金桶牛油可以令蛋糕鬆軟啲，兩溝令蛋糕唔會太淋，如無金桶牛油，可以只係用一隻無鹽牛油

• 糖我都兩溝左糖粉同黃糖，因為黃糖甜度比較低，如只用黃糖，糖總重量要加多啲啲，如只用糖粉，糖總重量要減少啲啲，最好唔好完全唔用糖粉，因為糖粉有助個蛋糕鬆軟啲

• 蕉最好用啲擺到好醜樣，熟過頭，好多黑點既。如果等唔切，可以放香蕉入大約150 – 160 度既焗爐，10 分鐘反面，至表面變黑(唔係燶，係蕉皮變啡黑色)，就可以得到一條非洲撚熟到入面溶溶地既熟蕉，最啱用黎焗蛋糕