書面語食譜連結

 

份量:約 180 克
材料
OREO奧利奧夾心餅乾(大塊) 1 筒(137 克)
忌廉芝士 50 克
白朱古力(免調溫) 適量
黑朱古力(免調溫) 適量
食用色素 適量

 

  1. 忌廉芝士置室溫放軟。另外,1 筒Oreo有 15 塊,打開其中 10 塊,用刀仔刮走白色餡料唔要。
    151205 - Oreo Truffles - 001
     
  2. 全部餅乾連有餡料果啲一齊放入保鮮袋入面,用硬物打碎成幼粒。(亦可用食物處理器)
    151205 - Oreo Truffles - 002
     
  3. 忌廉芝士先用膠刮壓散,加入打碎左既餅乾(留意因為餅乾連餡料一齊打,一定會有餅碎痴喺保鮮袋入面,記住刮乾淨);
    151205 - Oreo Truffles - 003
     
  4. 用邊拌邊壓既方法拌勻;
    151205 - Oreo Truffles - 004
     
  5. 最後成團。
    151205 - Oreo Truffles - 005
     
  6. 分成一份份用手搓成圓球,再放入雪櫃(冰凍室Freezer)15 分鐘雪至稍為硬身(唔使結冰)。
    151205 - Oreo Truffles - 006
     
  7. 溶左啲朱古力,將Oreo波浸入朱古力平均沾上,拎起平放喺牛油紙上面等朱古力凝固即成。之後可以用朱古力隨意裝飾,未食果陣請放喺雪櫃(冷藏室Refrigerator)儲存,室溫放得耐有出溫既危險!(因為Oreo餡本身有油)
    151205 - Oreo Truffles - 013
     

 

  • 注意,比較甜!!!注意,比較甜!!!注意,比較甜!!!
  • 我呢個份量做左 5 粒大波﹑4 粒細波。如果要整雪人,先照樣搓成圓球後放入雪櫃(冰凍室Freezer)約 10 分鐘,拎出黎用糖果棍仔先拮入細波,再拮入大波(拮好後雪人應該坐喺度,支棍向上),小心一定要慢慢溫柔咁拮,如果唔係好易散,拮好之後再放返入雪櫃(冰凍室Freezer)雪多 10 分鐘,再做沾朱古力既動作。
    如做單粒波沾朱古力會比較簡單,將Oreo波整粒放入溶左既朱古力入面,用兩隻叉輔助沾好後用叉兜起等多餘既朱古力流走,再將粒波放到牛油紙上面。
  • 朱古力如唔識調溫就買免調溫果種(烘焙店有售),可以用微波爐每叮20 – 30 秒拎出黎攪拌一路重覆至朱古力溶化,或者朱古力放入容器座熱水攪溶。注意朱古力唔好掂到水。如果覺得朱古力溶晒都係好杰好難控制既話可以加少少菜油(或無味既油)落去攪勻令佢稀啲滑身啲再用,但小心油加得太多朱古力既質地會變到好奇怪(會好似孤寒親戚個全盒入面果啲難食朱古力咁)。
  • 白朱古力可以加食用色素變其他顏色,朱古力正路應該用油溶性既食用色素不過比較難買同埋價錢較貴,如果少少地玩下就買普通果啲用少少算數喇。

 

(Visited 1,148 times, 1 visits today)