#自費 #一個人開飯系列 #粉嶺 #星味 #海南雞飯

之前有網友叫我去試下呢間餐廳,
趁呢排攰攰地,貪佢近近地就去試下。
話說海南雞飯源自海南島嘅文昌市,
果度啲人興食當地嘅文昌雞,
咁以前啲人唔嘥嘢㗎嘛,
所以會拎埋啲雞油同煮雞嘅水去煮飯。
清末果陣因為戰亂,當地有堆人避難避到去東南亞國家,
咁喺新地頭搵食最典型就係賣嘢食
(華人好鍾意用呢招),
搵兩餐之餘,順便懷念下家鄉,
賣嘅呢種雞加飯嘅配搭叫「海南雞飯」。
就好似去第二度你會見到「港式茶餐廳」「港式飲茶」,
喺香港你唔會見到招牌寫「港式」茶餐廳咁,
所以喺海南雞飯被發揚光大果陣,
海南島其實無一樣嘢叫「海南雞飯」。

星味鋪頭細細,只有幾張枱,
我平日十二點零去都唔少人嚟食或買外賣。
我叫咗個「星洲雞飯(新加坡口味海南雞飯)」HK$60,
指定要雞肶加咗HK$10,
再加多咗HK$10叫咗杯「星洲哥B冰」。
海南雞飯「套裝」一整盤上枱,
有碟雞、一碗油飯、一碗例湯,
同埋新加坡式海南雞飯必備嘅三色醬料。

雞算滑唔鞋(因加咗錢轉雞肶如果鞋真係不得了),
唔算特別嫩,不過真係幾多汁。
皮算厚,皮下面有「啫喱」,
「啫喱」呢個效果係要啲功能先做到
其實新加坡式嘅海南雞同白切雞唔同,
海南雞係用白滷水浸到入味,
(白滷水即係加咗香料但無加色嘅滷汁)
或者仲會用冰水浸到雞皮收縮做到皮爽嘅效果。
不過呢度嘅雞無咩特別勁嘅香料味或者雞味,
皮都唔算特別爽,
照加咗錢轉肶有加乘咁計,
只可以話啲雞正常,無咩特別好或者唔好。

雞隔嚟仲伴咗少少醋木耳同青瓜片,
木耳都算爽脆,少少酸,但吞完有少少「乸」喉。
青瓜片乾咗水,食落亦都唔脆,
好似切片後雪得太耐,一啲都唔新鮮。

其實我最重視係碗油飯多過碟雞,
佢呢度個油飯唔係一般見到嘅淡黃色,
反而係啡啡地嘅。
食落雞油味係有但唔重唔夠香,
紅蔥頭味仲重過雞油味。
食多幾啖習慣咗紅蔥頭陣味之後,
感覺唔知點解好似食緊好淡嘅豉油撈飯…
飯粒少少過濕,有黏性,
但最大問題係啲飯唔知係生骨定係有飯焦,
每一口都會有一兩粒硬硬嘅un住你個口,
所以我覺得碗油飯都幾垃圾。

跟埋嘅三色醬正常,其中個薑蓉幾香幾好味。

仲有碗例湯,我本來以為海南雞飯跟嘅湯會係雞湯,
原來佢畀嘅係中式例湯,眼見有舊豬骨同幾舊紅蘿蔔。
個湯有屋企煲嘅湯嘅感覺,
味道濃,舊豬骨啜落都幾好食、有肉味。
但係,食海南雞飯成盤最出色係個中式例湯係唔係有啲好笑呢?

呀,仲有杯「星洲哥B冰」,就係凍咖啡多甜多奶咁嘅味囉。
食完埋單HK$80,出嚟轉個彎望見群記……
當堂唉咗一聲……唉……

(招牌,門口仲貼咗廚師張相寫住「本店主理曾於2012年在新加坡五星級酒店獲得最佳美食大獎」,其實可唔可以寫清楚少少,咁樣我真係google唔到。)

星味 Star Pantry
店名:星味
地址:粉嶺聯和道57-63號嘉和軒地下4號舖

(Visited 142 times, 1 visits today)